ՄԻՋՈՑԱՌՈՒՄՆԵՐ

Հունիսի 1֊ին` Երեխաների պաշտպանության միջազգային օրը, Լոռու մարզային գրադարանի Մանկական բաժինը հյուրընկալեց Վանաձորի թիվ 1 հիմնական դպրոցի 5-րդ Բ դասարանի աշակերտներին (դասղեկ՝ բնագիտության, աշխարհագրության ուսուցչուհի Հերմինե Գրիգորյան, դպրոցի գրադարանավարուհի՝ Անահիտ Ասլիկյան)։ Արտադասարանային ժամի գլխավոր թեման էր «Սասունցի Դավիթ» էպոսը։ Բաժնի աշխատակցուհի Նարինե Ադամյանը երեխաներին հակիրճ ներկայացրեց էպոսի պատմությունը և կառուցվածքաբանությունը, որից հետո աշակերտները դիտեցին «Սասունցի Դավիթ» մուլտֆիլմը։

Այսօր Լոռու մարզային գրադարանում կազմակերպվել էր 2020-2021 ուստարվա դպրոցական առարկայական օլիմպիադաների հանրապետական փուլի դիպլոմակիրների պարգևատրումը:
Հանդիսավոր միջոցառմանը ներկա էին Լոռու մարզպետի տեղակալ Գոռ Ասրյանը, մարզպետարանի կրթության, մշակույթի և սպորտի վարչության պետ Արամ Գրիգորյանը, վարչության պաշտոնյաներ:
Դպրոցականներին շնորհավորեց և իր ու մարզպետ Արամ Խաչատրյանի անունից բարեմաղթանքի ջերմ խոսքեր հղեց Գոռ Ասրյանը: Նա հպարտությամբ շեշտեց, որ նախորդ ուստարվա համեմատությամբ այս ուստարում մրցանակակիրների թիվը ավելի քան կրկնապատկվել է՝ 15-ից դառնալով 33, ինչը հպարտանալու առիթ է տալիս: Նա հույս հայտնեց, որ տարեցտարի մրցանակակիրների թիվը կավելանա:
Գոռ Ասրյանը Լոռու մարզպետի շնորհավորագրեր հանձնեց բոլոր մրցանակակիրներին և նրանց ուսուցիչներին:
Ի դեպ՝ ՆԶՊ առարկայից ամենաշատ մրցանակային տեղերը Արցախից հետո նվաճել են հենց Լոռու մարզի դպրոցականները, ինչի առթիվ Լոռու մարզպետի տեղակալ Գոռ Ասրյանին նաև գավաթ հանձնվեց:

Մայիսի 25֊ին Լոռու մարզային գրադարանի Մանկական բաժնում Վանաձորի թիվ 3 հիմնական դպրոցի 8-րդ Բ դասարանի աշակերտները (դասղեկ՝ պատմության ուսուցչուհի Լուսինե Անտոնյան) դիտեցին և քննարկեցին Է. Համբարձումյանի`  Սարդարապատի հերոսամարտին նվիրված <<Խենթերը>> փաստավավերագրական ֆիլմը։

Այսօր Լոռու մարզային գրադարանի աշխատակիցները տնօրեն Կարինե Հակոբյանի հետ միասին այցելեցին Շահումյան համայնք: Նրանք եղան Շահումյանի միջնակարգ դպրոցում, որի գրադարանին որպես նվիրատվություն հանձնեցին 80 միավոր գրականություն: Այնուհետև այց կատարվեց Շահումյան համայնքի Մշակույթի տուն, որտեղ քննարկվեցին հետագա համատեղ անելիքները: Համագործակցությունը համայնքի կրթամշակութային հաստատությունների հետ շարունակական է: