«Կինը գրականության մեջ». Լենա Անթառանյան Լոռու մարզային գրադարանը նախաձեռնել է կանանց միամսյակին նվիրված «Կինը գրականության մեջ» խորագրով միջոցառումների շարք, որի շրջանակներում նախատեսվում են հանդիպումներ Լոռու մարզի կին գրողների հետ։ Միջոցառումների նպատակը նրանց ստեղծագործությունների նորովի արժևորումն է։ Շարքի անդրանիկ հյուրը բանաստեղծուհի Լենա Անթառանյանն էր։ Հանդիպումը վարում էր գրադարանի աշխատակից, բանաստեղծ Ռաֆ Բարաթյանը։ Բացման խոսքով հանդես եկավ գրադարանի տնօրեն Հեղինե Հալիվորյանը։ Նա շնորհավորեց Լենա Անթառանյանին և բոլոր կանանց` մարտի ութի ու միամսյակի կապակցությամբ, նշեց, որ կնոջ դերը միշտ առանցքային է եղել գրականության արարման գործում։ Տղամարդ գրողներին էլ շատ հաճախ ստեղծագործելու է մղել կնոջով ներշնչված լինելու հանգամանքը: Սա նշանակում է, որ առանց կնոջ տղամարդիկ անգամ չէին կարող ստեղծագործել: «Գարունը կին է, կինը՝ գրականություն… Կինը գարուն է, և նա գարունանում է հատկապես այն ժամանակ, երբ բնությունը կնոջ գույներով զարդարում է չորսբոլորը: Կինն ակունքն է ցանկացած արարման՝ կյանքից մինչև տիեզերք, տիեզերքից մինչև կյանք…»,- նշեց Ռաֆ Բարաթյանը: Նա պատմական համառոտ ակնարկով ներկայացրեց կանանց դերը համաշխարհային գրականության համաբնագրում: Առաջին հայտնի կին գրողներից է Էնհեդուաննան, որն Ինաննա աստվածուհու և լուսնի Նաննա աստծո քրմուհին էր: Էնհեդուաննան մի քանի ներբողների և օրներգերի հավաքածուի հեղինակ է: Կանայք գրական ժառանգություն են թողել նաև Միջնադարում, Վերածննդի ժամանակաշրջանում, հետագա պարբերափուլերում: Կանանց գրական ներկայությունն առավել քան նկատելի է նաև այսօր: Ռաֆ Բարաթյանն իր խոսքի վերջում նշեց. «Եթե փորձեմ մեկ բառով բնութագրել Լենա Անթառանյանին, այդ բառը կլինի «Առաքինությունը»»: ՀԳՄ Լոռու բաժանմունքի նախագահ, բանաստեղծ Մանվել Միկոյանը նույնպես շնորհավորեց Լենա Անթառանյանին և բոլոր կանանց՝ մարտի ութի և միամսյակի կապակցությամբ: «Պարտադիր չէ, որ գրողն ամեն օր գրի, բայց պարտադիր է, որ ամեն օր զբաղվի գրականությամբ»,-նշեց Մանվել Միկոյանը: Լենա Անթառանյանն այն հեղինակներից է, որ ամեն օր զբաղվում է գրականությամբ, և նրա հարաբերական լռությունը չպետք է համարել ասելիքի սպառվածություն: Մանվել Միկոյանը Լենա Անթառանյանի բանաստեղծություններից մեջբերեց «Տվեք ինձ աշխարհի ճերմակ ձին» տողը: Եթե գրեր «երկնային ճերմակ ձին», ավելի հեշտությամբ կհասկանայինք, որ նկատի ունի Պեգասը: Հենց այդ Պեգասը հեծած՝ մոտ կես դար շրջում է Լենա Անթառանյանը: Նա ունի ինքնատիպ ձեռագիր. նրա տողն անշփոթելի է: Ողջունելի է այն հանգամանքը, որ բանաստեղծուհին կյանքում ևս այն է, ինչ առկա է նրա գրականության մեջ: Լենա Անթառանյանի կերպարում դրսևորվում են այն ողջ բարությունն ու անաղարտությունը, որ առկա են նրա գրականության մեջ: «Կնոջ դերը գրականության մեջ սաղմնավորվել է դեռ հինաշխարհյան ժամանակներից… Ըստ Ձեզ՝ ժամանակն ավելացնու՞մ, թե՞ պակասեցնում է կնոջ դերը գրականության մեջ»,-բանաստեղծուհուն հարց հղեց Ռաֆ Բարաթյանը: Լենա Անթառանյանը խոսեց իրեն ոգեշնչած կին հեղինակների մասին՝ փաստելով, որ կանայք մեր օրերում էլ շարունակում են պահպանել իրենց կենտրոնական դերը հայ և համաշխարհային գրականության մեջ: Ռաֆ Բարաթյանը հետաքրքիր հարցերի միջոցով փորձեց ընդհանրացնել Լենա Անթառանյան բանաստեղծուհու գեղարվեստական աշխարհի հիմնաքարերն ու հիմնասյուները: Այն հարցին, թե գրականության մեջ որտեղ է սկսվում և ավարտվում կնոջ աշխարհը, Լենա Անթառանյանը պատասխանեց, որ սկսվում է սիրուց և չի ավարտվում: Անդրադարձ կատարվեց նաև կին ու տղամարդ ստեղծագործողների տարբերություններին: Լենա Անթառանյանը փաստեց, որ կնոջ ստեղծագործական աշխարհն առանձնահատուկ է: Կան ապրումներ, որոնք հասու են միայն կնոջը, և տղամարդը չի կարող անցնել դրանց միջով: Հարցուպատասխանը բավականին հետաքրքիր էր և բովանդակալից: Միջոցառման մասնակիցները նույնպես մասնակցեցին քննարկմանը, բանաստեղծուհուն հղեցին իրենց հարցերը: Միջոցառման ավարտին Լենա Անթառանյանը հանդես եկավ շնորհակալական խոսքով՝ երիտասարդ սերնդի ստեղծագործողներին մաղթելով մեծ սեր և պոետական ներշնչումներ:
Ուղարկված է
Write to Karen Manoucharian